Medaram: మేడారం పుణ్యక్షేత్రం పునఃప్రారంభం.. కుటుంబ సమేతంగా అమ్మవార్లను దర్శించుకున్న సీఎం రేవంత్

ఆదివాసీల మహా కుంభమేళాగా ప్రసిద్ధి చెందిన మేడారం సమ్మక్క-సారలమ్మ పుణ్యక్షేత్రం చారిత్రాత్మక ఘట్టానికి వేదికైంది. ఆలయ పునరుద్ధరణ పనులు విజయవంతంగా పూర్తి కావడంతో, ముఖ్యమంత్రి రేవంత్ రెడ్డి ఈ క్షేత్రాన్ని అధికారికంగా ప్రజలకు అంకితం చేశారు. వెయ్యేళ్ల వీరగాథకు, జాతి వారసత్వ సంపదకు ప్రతీకగా నిలిచే మేడారం గద్దెలు, ఆలయ ప్రాంగణాన్ని ఆయన పునఃప్రారంభించారు.

ముఖ్యమంత్రి రేవంత్ రెడ్డి తన కుటుంబ సభ్యులతో కలిసి ఈ వేడుకలో పాల్గొన్నారు. శాస్త్రోక్తంగా నిర్వహించిన పూజా కార్యక్రమాల అనంతరం, ఆయన అమ్మవార్ల గద్దెలపై నిలువెత్తు బంగారాన్ని (బెల్లం) మొక్కుగా సమర్పించి ఆశీర్వాదం తీసుకున్నారు. అంతకుముందు క్షేత్ర ప్రాంగణంలో ఏర్పాటు చేసిన పైలాన్‌ను ఆవిష్కరించి, పునరుద్ధరణ పనుల జ్ఞాపకార్థం శిలాఫలకాన్ని ప్రారంభించారు.

ఈ కార్యక్రమంలో ఉప ముఖ్యమంత్రి మల్లు భట్టి విక్రమార్క, పలువురు రాష్ట్ర మంత్రివర్గ సహచరులు, ప్రజాప్రతినిధులు పాల్గొన్నారు. రాష్ట్రం సుభిక్షంగా ఉండాలని, ప్రజలందరికీ అమ్మవార్ల దీవెనలు అందాలని సీఎం ఈ సందర్భంగా ఆకాంక్షించారు. చారిత్రక నేపథ్యం దెబ్బతినకుండా, భక్తులకు మెరుగైన వసతులు కల్పించేలా ప్రభుత్వం ఈ క్షేత్రాన్ని ఆధునీకరించింది.