భారత్లో దూసుకుపోతున్న గిగ్ ఎకానమీ.. 2030 నాటికి 21 మిలియన్లకు చేరుకోనున్న గిగ్ వర్క్ఫోర్స్!
భారతదేశంలో గిగ్ ఇంటర్నెట్ వర్క్ఫోర్స్ గణనీయమైన వృద్ధిని సాధించే దిశగా అడుగులు వేస్తోంది
భారతదేశంలో గిగ్ ఇంటర్నెట్ వర్క్ఫోర్స్ గణనీయమైన వృద్ధిని సాధించే దిశగా అడుగులు వేస్తోంది. ‘గిగ్ ఇంటర్నెట్ వర్క్ఫోర్స్ ఇన్ ఇండియా: బ్రిడ్జ్ టు ~20 మిలియన్ లైవ్లీహుడ్స్’ పేరుతో రెడ్సీర్ స్ట్రాటజీ కన్సల్టెంట్స్ విడుదల చేసిన నివేదిక ఈ విషయాన్ని వెల్లడించింది. ప్రస్తుతం 6 మిలియన్లకు పైగా ఉన్న ఈ వర్క్ఫోర్స్, 2030 నాటికి 17 నుండి 21 మిలియన్ల వరకు విస్తరించవచ్చని అంచనా.
గిగ్ ఎకానమీ – ఆర్థిక సాధికారత:
నిరుద్యోగితను తగ్గించడంలో , ఉపాధి అవకాశాలను మెరుగుపరచడంలో గిగ్ ఎకానమీ కీలక పాత్ర పోషిస్తోంది:
ఉపాధి లేని వారికి వరం: ఈ ప్లాట్ఫామ్లలో చేరడానికి ముందు 54 శాతం మంది వర్కర్లు ఎటువంటి వేతన ఉపాధిలో లేరు.
కొత్తగా ప్రవేశించేవారు: 2030 నాటికి మొత్తం గిగ్ వర్క్ఫోర్స్లో 30 శాతానికి పైగా కార్మికులు మొదటిసారిగా లేబర్ మార్కెట్లోకి ప్రవేశించేవారే ఉంటారని అంచనా.
ఎక్కువ సంపాదన: డెలివరీ, రైడ్-హెయిలింగ్ , హోమ్ సర్వీసెస్ వంటి రంగాల్లో ఫుల్-టైమ్ గిగ్ వర్కర్లు, సమానమైన ఇతర ఉద్యోగాలతో పోలిస్తే 2.5 రెట్లు ఎక్కువ ఆదాయాన్ని పొందుతున్నారు.
నైపుణ్యాల పెంపు: సుమారు 70 శాతం మంది వర్కర్లు ఈ ప్లాట్ఫామ్లలో పొందే అనుభవం , నైపుణ్యాలు తమ భవిష్యత్తు ఆదాయ అవకాశాలను మెరుగుపరుస్తాయని నమ్ముతున్నారు.
సంక్షేమం , భవిష్యత్తు దిశానిర్దేశం:
గిగ్ ఎకానమీలో ప్రమాద బీమా, అత్యవసర సహాయం , నైపుణ్యాభివృద్ధి వంటి సంక్షేమ చర్యలు పెరుగుతున్నాయి. ‘కోడ్ ఆన్ సోషల్ సెక్యూరిటీ’ అమలు ద్వారా ఈ వర్కర్లకు సామాజిక భద్రత కల్పించే దిశగా కీలక పురోగతి కనిపిస్తోంది.
మెరుగుపరచాల్సిన అంశాలు:
అవగాహన: ప్రభుత్వ నేతృత్వంలోని సంక్షేమ పథకాలపై వర్కర్లకు అవగాహన , అందుబాటును పెంచాల్సిన అవసరం ఉంది.
మహిళల భాగస్వామ్యం: మహిళల భాగస్వామ్యాన్ని పెంచడం ఒక ప్రధాన అవకాశంగా గుర్తించారు. డిజిటల్ అక్షరాస్యత, భద్రత , సౌలభ్యం వంటి అంశాలపై దృష్టి సారించడం ద్వారా మహిళా ఉపాధిని మెరుగుపరచవచ్చు.
ఈ వృద్ధిని మరింత విస్తృతం , సమగ్రంగా మార్చడానికి ప్లాట్ఫామ్లు , విధాన నిర్ణేతల మధ్య సమన్వయం అవసరమని రెడ్సీర్ స్ట్రాటజీ కన్సల్టెంట్స్ భాగస్వామి కుశాల్ భట్నాగర్ పేర్కొన్నారు.
