RIP Ajit Pawar: మహారాష్ట్రలో విషాదం.. విమాన ప్రమాదంలో డిప్యూటీ సీఎం అజిత్ పవార్ మృతి

మహారాష్ట్ర రాజకీయాల్లో పెను విషాదం చోటుచేసుకుంది. రాష్ట్ర రాజకీయ దిగ్గజం, ప్రస్తుత ఉప ముఖ్యమంత్రి అజిత్ పవార్ (66) బుధవారం ఉదయం జరిగిన ఘోర విమాన ప్రమాదంలో మరణించారు. ముంబై నుంచి బారామతికి వెళ్తుండగా, ల్యాండింగ్ సమయంలో సాంకేతిక లోపంతో విమానం కుప్పకూలింది. తన రాజకీయ ప్రస్థానానికి ఊపిరిపోసిన సొంత నియోజకవర్గం బారామతి గడ్డపైనే ఆయన ప్రాణాలు కోల్పోవడం అభిమానులను, పార్టీ శ్రేణులను తీవ్ర దిగ్భ్రాంతికి గురిచేసింది.

ప్రచారానికి బయల్దేరుతుండగా..
ఎన్నికల ప్రచార సభల్లో పాల్గొనేందుకు బయలుదేరిన అజిత్ పవార్ ప్రయాణిస్తున్న విమానం, బారామతి విమానాశ్రయంలో దిగుతున్న సమయంలో రన్‌వేను తప్పింది. పక్కనే ఉన్న ఖాళీ ప్రదేశంలో విమానం పడిపోగానే ఒక్కసారిగా ఇంధన ట్యాంక్ పేలి అగ్నిప్రమాదం సంభవించింది. ఈ దుర్ఘటనలో అజిత్ పవార్ అక్కడికక్కడే మృతి చెందినట్లు అధికారులు ధ్రువీకరించారు. విమానంలో ఉన్న ఇతర సిబ్బంది మరియు ప్రయాణికుల పరిస్థితి కూడా ఆందోళనకరంగా ఉన్నట్లు సమాచారం.

మహారాష్ట్ర రాజకీయ చరిత్రలో అజిత్ పవార్ ఒక బలమైన ముద్ర వేశారు. రాష్ట్ర చరిత్రలో ఆరుసార్లు ఉప ముఖ్యమంత్రిగా పనిచేసిన ఏకైక నాయకుడిగా ఆయన రికార్డు సృష్టించారు. పరిపాలనలో కఠినంగా ఉంటూనే, కార్యకర్తలకు ఎల్లప్పుడూ అందుబాటులో ఉండే నేతగా ఆయనకు గుర్తింపు ఉంది. ఆయన అకాల మరణం మహారాష్ట్ర రాజకీయాల్లో పూడ్చలేని లోటును మిగిల్చింది. ప్రభుత్వం ఈ విషాద సమయంలో రాష్ట్రవ్యాప్తంగా సంతాప దినాలను ప్రకటించే అవకాశం ఉంది.