కలుషిత గాలి, మారుతున్న వాతావరణం.. మీ కళ్ళను కాపాడుకోండి ఇలా! డాక్టర్ వివేక్ సింగ్ కీలక సూచనలు

హైదరాబాద్: మారుతున్న కాలం, నగరాల్లో పెరుగుతున్న వాయు కాలుష్యం మన కంటి ఆరోగ్యానికి పెను సవాలుగా మారుతున్నాయి. ముఖ్యంగా ఫిబ్రవరి, మార్చి నెలల మధ్య కాలాన్ని “కంటి ఆరోగ్యం దెబ్బతినే కీలక సమయం”గా హైదరాబాద్‌కు చెందిన ప్రముఖ క్యాటరాక్ట్ , రిఫ్రాక్టివ్ సర్జన్ డాక్టర్ వివేక్ ఎమ్. సింగ్ పేర్కొన్నారు. ఈ సమయంలో పెరుగుతున్న ఉష్ణోగ్రతలు, గాలిలో తేమ తగ్గడం, పరాగరేణువుల (Pollen) ప్రభావం వల్ల కళ్లలో దురద, ఎరుపు, మంట వంటి ఫిర్యాదులు పెరుగుతున్నాయని ఆయన తెలిపారు.

కళ్లు ఎందుకు ఇబ్బంది పడతాయి?
వాతావరణ మార్పుల వల్ల కళ్లు మూడు రకాలుగా దెబ్బతింటాయి:

అలర్జీలు: గాలిలోని పరాగరేణువుల వల్ల కంటి పొరలు వాచిపోతాయి.

కంటి పొడిబారడం: గాలిలో తేమ హెచ్చుతగ్గులు, ఏసీల వాడకం వల్ల కన్నీటి పొర త్వరగా ఆవిరైపోయి కళ్లు పొడిబారుతాయి (Dry Eye).

యూవీ కిరణాల ప్రభావం: దుమ్ము కణాల వల్ల భౌతికమైన ఇబ్బందులతో పాటు, సూర్యరశ్మిలోని తీవ్రమైన యూవీ కిరణాల వల్ల కంటి మంటలు పెరుగుతాయి.

వాయు కాలుష్యంతో రెట్టింపు ప్రమాదం
నగరవాసులకు వాహనాల కాలుష్యం, సూక్ష్మ ధూళి కణాలు (PM2.5) పెద్ద శత్రువులని డాక్టర్ సింగ్ హెచ్చరించారు. నైట్రోజన్ ఆక్సైడ్, సల్ఫర్ డయాక్సైడ్ వంటి రసాయనాలు కంటిలోని సున్నితమైన కణాలను దెబ్బతీస్తాయి. దీనివల్ల పట్టణ ప్రాంతాల్లో ‘డ్రై ఐ డిసీజ్’ , ‘అలెర్జిక్ కంజంక్టివిటిస్’ కేసులు విపరీతంగా పెరుగుతున్నాయి.

నివారణ చర్యలు – నిపుణుల సూచనలు:
కంటి సమస్యల నుండి బయటపడటానికి డాక్టర్ వివేక్ సింగ్ కొన్ని ముఖ్యమైన చిట్కాలను సూచించారు:

• రక్షణ కవచం: బయటకు వెళ్లేటప్పుడు గాలి, దుమ్ము, యూవీ కిరణాల నుండి రక్షణ ఇచ్చే ‘ర్యాప్ అరౌండ్’ సన్ గ్లాసెస్ ధరించండి. ముఖ్యంగా టూ వీలర్ వాహనదారులు ఇది తప్పనిసరిగా పాటించాలి.
• కళ్లు రుద్దకండి: కళ్లలో దురదగా ఉన్నప్పుడు ఎట్టి పరిస్థితుల్లోనూ రుద్దకూడదు. దీనివల్ల కంటికి సూక్ష్మ గాయాలై ఇన్ఫ్లమేషన్ పెరుగుతుంది.
• శుభ్రత ముఖ్యం: బయట తిరిగి వచ్చిన తర్వాత ముఖాన్ని, కనురెప్పలను శుభ్రమైన నీటితో కడుక్కోవాలి.
• ఐ డ్రాప్స్: కళ్లలో మంటను తగ్గించేందుకు ప్రిజర్వేటివ్-ఫ్రీ ‘ఆర్టిఫిషియల్ టియర్స్’ (కన్నీటి చుక్కల వంటి మందు) వాడాలి. బయటకు వెళ్లడానికి ముందే వీటిని వాడితే కంటిపై ఒక రక్షణ పొరలా పనిచేస్తాయి.
• గాలి నేరుగా తగలకుండా: ఏసీ వెెంట్స్, ఫ్యాన్లు లేదా కూలర్ల నుండి వచ్చే గాలి నేరుగా ముఖం మీద పడకుండా చూసుకోవాలి.
• 20-20-20 నియమం: కంప్యూటర్, మొబైల్ వాడేవారు ప్రతి 20 నిమిషాలకు ఒకసారి, 20 అడుగుల దూరంలో ఉన్న వస్తువును 20 సెకన్ల పాటు చూడాలి. దీనివల్ల కళ్లపై ఒత్తిడి తగ్గుతుంది.

వీరు మరింత జాగ్రత్తగా ఉండాలి!
చిన్నపిల్లలు, వృద్ధులు, కాంటాక్ట్ లెన్స్ వాడేవారు , ఇటీవలే లాసిక్ (LASIK) లేదా క్యాటరాక్ట్ సర్జరీ చేయించుకున్న వారు ఈ కాలుష్య సమయంలో మరింత అప్రమత్తంగా ఉండాలి. అధిక కాలుష్యం ఉన్న రోజుల్లో కాంటాక్ట్ లెన్స్‌లకు బదులు కళ్లద్దాలు వాడటం మంచిదని డాక్టర్ సూచించారు.

డాక్టర్ని ఎప్పుడు కలవాలి?
కంటి నొప్పి, చూపు మసకబారడం, కళ్ల నుండి నీరు కారడం లేదా వెలుతురు చూడలేకపోవడం వంటి లక్షణాలు ఉంటే వెంటనే వైద్యుడిని సంప్రదించాలి. సొంతంగా స్టెరాయిడ్ చుక్కల మందులు వాడకూడదని, ఇది గ్లాకోమా లేదా క్యాటరాక్ట్ వంటి తీవ్రమైన సమస్యలకు దారితీస్తుందని డాక్టర్ సింగ్ హెచ్చరించారు. ప్రతి ఏడాది ఫిబ్రవరిలో అలర్జీ బారిన పడేవారు, సీజన్ ప్రారంభానికి ముందే వైద్యుడిని కలిసి ముందస్తు చికిత్స తీసుకోవడం ఉత్తమం.