BRS: మున్సిపల్ ఎన్నికల వేళ కాంగ్రెస్‌కు షాక్.. బీఆర్ఎస్‌లో చేరిన గడ్డపోతారం మాజీ సర్పంచ్!

తెలంగాణలో మున్సిపల్ ఎన్నికల నగారా మోగనున్న నేపథ్యంలో పటాన్ చెరు నియోజకవర్గంలో రాజకీయ పరిణామాలు ఆసక్తికరంగా మారుతున్నాయి. నియోజకవర్గ పరిధిలోని గడ్డపోతారం గ్రామానికి చెందిన కీలక నాయకులు కాంగ్రెస్ పార్టీని వీడి బీఆర్ఎస్ (BRS) గూటికి చేరుతున్నారు. తాజాగా గడ్డపోతారం మాజీ సర్పంచ్ నీరుడి ప్రభావతి శ్రీనివాస్ తన అనుచరులతో కలిసి బీఆర్ఎస్ పార్టీలో చేరారు.

మాజీ మంత్రి, బీఆర్ఎస్ సీనియర్ నేత తన్నీరు హరీష్ రావు నివాసంలో జరిగిన ఈ కార్యక్రమంలో ఆయన స్వయంగా వారికి పార్టీ కండువా కప్పి సాదరంగా ఆహ్వానించారు. క్షేత్రస్థాయిలో బలం ఉన్న నాయకులు పార్టీలో చేరడం వల్ల రాబోయే మున్సిపల్ ఎన్నికల్లో పటాన్చెరు ప్రాంతంలో బీఆర్ఎస్ విజయానికి మార్గం సుగమం అవుతుందని పార్టీ శ్రేణులు భావిస్తున్నాయి. జిన్నారం మాజీ జెడ్పీటీసీ కొలన్ బాల్ రెడ్డి నాయకత్వంలో ఈ చేరికల ప్రక్రియ జరిగింది. గత కొంతకాలంగా నియోజకవర్గంలో పార్టీని బలోపేతం చేసే దిశగా కొలన్ బాల్ రెడ్డి విస్తృతంగా పర్యటిస్తున్నారు. ఈ చేరిక కార్యక్రమంలో పులిగిల్లా శ్రీనివాస్, వేణుగోపాల్‌తో పాటు పలువురు స్థానిక నాయకులు, కార్యకర్తలు పెద్ద సంఖ్యలో పాల్గొన్నారు.

మున్సిపల్ ఎన్నికల నేపథ్యంలో ఇతర పార్టీల నుండి అసంతృప్త నాయకులను చేర్చుకోవడం ద్వారా తమ బలాన్ని నిరూపించుకోవాలని బీఆర్ఎస్ వ్యూహరచన చేస్తోంది. అభివృద్ధి పనుల పట్ల ఆకర్షితులై తాము పార్టీలో చేరుతున్నట్లు ఈ సందర్భంగా నాయకులు పేర్కొన్నారు. ఈ పరిణామం స్థానిక కాంగ్రెస్ శ్రేణుల్లో చర్చనీయాంశంగా మారింది.