Medical Counsil: మెడికల్ కౌన్సిల్ అధికారంపై సర్కారు పెత్తనం.. జీవో 229 రద్దుకు జూడాల డిమాండ్

సంగారెడ్డి: రాష్ట్ర వైద్య మండలి (టీజీఎంసీ) స్వయంప్రతిపత్తిని దెబ్బతీసేలా ప్రభుత్వం జారీ చేసిన జీవో నంబర్ 229ను వెంటనే రద్దు చేయాలని డిమాండ్ చేస్తూ సంగారెడ్డి ప్రభుత్వ మెడికల్ కాలేజ్ ముందు జూనియర్ డాక్టర్లు భారీ ఆందోళన చేపట్టారు. ప్లకార్డులు ప్రదర్శిస్తూ ప్రభుత్వ నిర్ణయానికి వ్యతిరేకంగా నినాదాలు చేశారు.

బ్యూరోక్రాట్ల హవాపై వైద్యుల ఆవేదన
ఈ సందర్భంగా జూనియర్ డాక్టర్ల సంఘం ప్రతినిధులు మాట్లాడుతూ.. కొత్త జీవో వల్ల వైద్యరంగంలో నిపుణులైన వైద్యుల ప్రాధాన్యత తగ్గి, బ్యూరోక్రాట్ల (ప్రభుత్వ అధికారుల) జోక్యం పెరుగుతుందని ఆవేదన వ్యక్తం చేశారు. వైద్య మండలిలో ఉండాల్సిన ప్రజాస్వామ్య పద్ధతులను పక్కనపెట్టి, అధికారుల పెత్తనానికి ఆస్కారం కల్పించడం సరికాదని వారు పేర్కొన్నారు.

ఎక్స్ అఫీషియో సభ్యుల పెంపుపై ఆగ్రహం
తెలంగాణ మెడికల్ కౌన్సిల్ లో ఎక్స్ అఫీషియో సభ్యుల సంఖ్యను ప్రభుత్వం ఏకపక్షంగా రెట్టింపు చేయడాన్ని వైద్య విద్యార్థులు తీవ్రంగా ఖండించారు. ఈ చర్య వల్ల కౌన్సిల్ తన స్వతంత్రతను కోల్పోయి, ప్రభుత్వం చేతిలో కీలుబొమ్మగా మారుతుందని విమర్శించారు. వైద్యుల సమస్యలను పరిష్కరించాల్సిన వేదికను నిర్వీర్యం చేసి, అధికారాలను తమ గుప్పిట్లో పెట్టుకునేందుకు ప్రభుత్వం కుట్ర చేస్తోందని ఆరోపించారు.

వైద్య విద్య నాణ్యతను, వైద్యుల హక్కులను రక్షించాల్సిన కౌన్సిల్ పై రాజకీయ జోక్యం పెరిగితే భవిష్యత్తులో తీవ్ర నష్టం జరుగుతుందని జూడాలు హెచ్చరించారు. ప్రభుత్వం తక్షణమే స్పందించి వివాదాస్పద జీవోను వెనక్కి తీసుకోవాలని, లేదంటే ఆందోళనలను మరింత ఉధృతం చేస్తామని వారు స్పష్టం చేశారు.