బీరంగూడ గుట్టపై అక్రమణలు వెంటనే తొలగించండి: అధికారులకు ఎమ్మెల్యే జిఎంఆర్ ఆదేశం

బీరంగూడలోని ప్రసిద్ధ శ్రీ భ్రమరాంబ మల్లికార్జున స్వామి క్షేత్రంలో మహాశివరాత్రి జాతర ఏర్పాట్లపై ఎమ్మెల్యే గూడెం మహిపాల్ రెడ్డి (జిఎంఆర్) గురువారం సమీక్ష నిర్వహించారు. ఫిబ్రవరి 14 నుండి 18 వరకు జరిగే ఈ వేడుకలకు సుమారు 4 లక్షల మంది భక్తులు వచ్చే అవకాశం ఉందని, సామాన్య భక్తులకే ప్రథమ ప్రాధాన్యత ఇవ్వాలని ఆయన అధికారులను ఆదేశించారు. దేవాలయ ఆవరణలో ఉన్న కబ్జాలను 24 గంటల్లోగా తొలగించాలని రెవెన్యూ అధికారులను ఎమ్మెల్యే హెచ్చరించారు.

• సమన్వయం: ఐదు రోజుల పాటు అన్ని శాఖలు కలిసి పనిచేయాలని, భక్తుల కోసం ఇంటిగ్రేటెడ్ కంట్రోల్ రూమ్ ఏర్పాటు చేయాలని సూచించారు.

• భద్రత: నిఘా కోసం 50 సిసి కెమెరాలు ఏర్పాటు చేయాలని, రద్దీ నియంత్రణకు ఆధునిక సాంకేతికతను వాడాలని పోలీసులకు తెలిపారు.

• సౌకర్యాలు: భక్తుల కోసం ఆర్టీసీ ప్రత్యేక బస్సులు నడపాలని, వీఐపీల పేరుతో సామాన్యులకు ఇబ్బంది కలిగించవద్దని స్పష్టం చేశారు. ఏర్పాట్లపై తుది సమీక్షను ఈ నెల 12న మరోసారి నిర్వహించనున్నట్లు ఎమ్మెల్యే వెల్లడించారు.