జియోహాట్‌స్టార్ ఓపెన్ ఏఐ భాగస్వామ్యం.. భారత స్ట్రీమింగ్ రంగంలోకి కన్వర్సేషనల్ ఏఐ విప్లవం

హైదరాబాద్: భారతదేశపు అతిపెద్ద స్ట్రీమింగ్ ప్లాట్‌ఫామ్ అయిన జియోహాట్‌స్టార్, ఓపెన్ ఏఐ (OpenAI) సంస్థతో జతకట్టి కన్వర్సేషనల్ వాయిస్ డిస్కవరీ (CVD) ఫీచర్‌ను పరిచయం చేసింది. కంటెంట్ సెర్చింగ్ విధానంలోనే ఇది ఒక విప్లవాత్మక మార్పుగా నిలవనుంది. చాట్ జీపీటీ ఆధారంగా పనిచేసే ఈ ఫీచర్ ద్వారా ఇకపై కేవలం కీవర్డ్స్‌తో వెతకాల్సిన అవసరం లేకుండా, నేరుగా మాటలతో సంభాషిస్తూ మనకు నచ్చిన కంటెంట్‌ను కనుగొనవచ్చు. డిజిటల్ ఎంటర్టైన్‌మెంట్ రంగంలో సెర్చింగ్ ప్రక్రియలో ఎదురయ్యే ప్రధాన ఇబ్బందులను తొలగించడానికి ఈ సాంకేతికతను తీసుకువచ్చారు.

కన్వర్సేషనల్ వాయిస్ డిస్కవరీ ప్రధానంగా వినియోగదారులు తమ మూడ్ లేదా సందర్భానికి తగినట్టుగా మాట్లాడినా లేదా టైప్ చేసినా, దానికి అనుగుణంగా అత్యంత కచ్చితమైన, వ్యక్తిగతీకరించిన సూచనలను అందిస్తుంది. ఉదాహరణకు, ఒక ప్రేక్షకుడు “మా తల్లిదండ్రులు ఇంటికి వచ్చారు, మేమంతా కలిసి చూడగలిగే ఏదైనా మంచి సినిమా లేదా షోని సూచించండి” అని అడగవచ్చు. అలాగే “నాకు డ్రామా కావాలి కానీ అది మరీ ఎమోషనల్‌గా ఉండకూడదు” ఇలాంటి లోతైన అంశాలను కోరినప్పుడు కూడా, ఈ సిస్టమ్ కేవలం కీవర్డ్‌లను మాత్రమే కాకుండా యూజర్ అసలు ఉద్దేశాన్ని అర్థం చేసుకుని స్పందిస్తుంది. వినియోగదారులు ఏమడుగుతున్నారనే దానితో పాటు, వారు నేరుగా చెప్పలేని అవసరాలను కూడా గ్రహించేలా దీనిని రూపొందించారు.

భారత్ వంటి విభిన్న భాషలు ఉన్న దేశంలో, ఈ ఫీచర్ బహుభాషా సామర్థ్యం అత్యంత కీలకం. సీవీడీ ఫీచర్ హిందీ ఇంగ్లీష్ భాషల్లో అద్భుతంగా పనిచేస్తుంది. వినియోగదారులు ఒకే సంభాషణ మధ్యలో భాష మార్చినా సరే, సిఫార్సుల నాణ్యతలో ఎటువంటి మార్పు ఉండదు. “కోయి లైట్ హార్టెడ్ కామెడీ దిఖావో” (Koi light-hearted comedy dikhao) లేదా “థ్రిల్లర్ హై బట్ జ్యాదా డార్క్ నహీ చాహియే” (Thriller hai but zyada dark nahi chahiye) వంటి హిందీ ప్రాంప్ట్‌లను కూడా ఇది ఇంగ్లీష్ క్వెరీలతో సమానమైన కచ్చితత్వంతో అర్థం చేసుకుంటుంది. కేవలం మెట్రో నగరాల్లోని ఇంగ్లీష్ మాట్లాడే వారికే కాకుండా, దేశవ్యాప్తంగా అందరు ప్రేక్షకులకు చేరువవ్వాలనే లక్ష్యంతో ఈ సాంకేతికతను తీర్చిదిద్దారు.

ఈ ఫీచర్ ప్రత్యక్ష క్రీడలకు (లైవ్ స్పోర్ట్స్) కూడా వర్తిస్తుంది. ఇది జియోహాట్‌స్టార్‌లో అత్యధిక ఆదరణ పొందే విభాగం. లైవ్ క్రికెట్ మ్యాచ్ జరుగుతున్న సమయంలో వినియోగదారులు “ఇప్పుడే ఏం జరిగింది?”, “ప్రస్తుతం టాప్ స్కోరర్ ఎవరు?” లేదా “చివరి వికెట్ పడిన దృశ్యాన్ని మళ్ళీ చూపించు” వంటి ప్రశ్నలను అడగవచ్చు. దీనివల్ల స్ట్రీమింగ్‌ను వదలకుండానే వారు అడిగిన దానికి తక్షణమే సందర్భోచితంగా సమాధానాలు లభిస్తాయి. ఇది కేవలం కంటెంట్‌ను వెతకడానికే కాకుండా, లైవ్ ఈవెంట్‌ల సమయంలో ఒక ఇంటెలిజెన్స్ లేయర్‌లా పనిచేస్తుంది.

జియోహాట్‌స్టార్ ఓపెన్ ఏఐ భాగస్వామ్యం పరస్పర సహకారంతో కూడినది. జియోహాట్‌స్టార్ యాప్ వాడుతున్న వారు చాట్ జీపీటీ ఆధారిత డిస్కవరీ ఫీచర్‌ను ఉపయోగించుకోవచ్చు. అదే సమయంలో ఎవరైనా నేరుగా చాట్ జీపీటీని ఎంటర్టైన్‌మెంట్ గురించి ఏవైనా అడిగితే, వారికి జియోహాట్‌స్టార్ కేటలాగ్ నుండి సంబంధిత కంటెంట్ సూచనలు స్ట్రీమింగ్ లింకులు అందుతాయి. ఈ ఒప్పందం వల్ల ప్లాట్‌ఫామ్ పరిధి తన సొంత యాప్‌కే పరిమితం కాకుండా, ప్రపంచవ్యాప్తంగా అత్యధికంగా వాడుతున్న ఏఐ ఇంటర్‌ఫేస్‌లలో కూడా భాగమైంది.

ఈ భాగస్వామ్యంతో జియోహాట్‌స్టార్ కృత్రిమ మేధస్సును కేవలం ఒక అదనపు ఫీచర్‌గా మాత్రమే కాకుండా, వినియోగదారుల అనుభవంలో ఒక ప్రాథమిక అంశంగా మారుస్తోంది. దీని ద్వారా భారత్‌లో అత్యాధునికమైన అందరికీ అందుబాటులో ఉండే కంటెంట్ డిస్కవరీ విధానంలో ఈ సంస్థ ఒక కొత్త ప్రమాణాన్ని నెలకొల్పుతోంది. అనంతమైన కంటెంట్‌ను స్మార్ట్ పద్ధతిలో సెర్చ్ చేసే ఈ విధానం భవిష్యత్తులో డిజిటల్ స్ట్రీమింగ్ రంగంలో సరికొత్త మార్పులకు శ్రీకారం చుట్టనుంది.